Wittlinga hoißt uf d’r Alb der Flecka,

mo jed’r Holzstab ischt a Stecka;

mo ma zom Traktor Bulldog sait

ond mo es scheene Mädla geit.

​

Do be i en d’ Grondschual ganga,

ond hau zom Leasa ond Schreiba oa’g'fanga.

En d’r 4. Klass häb m’r miaßa en Aufsatz schreiba.

​

„Ällas muaß wohr sai ond ed üb’rtreiba!“

Des waret die Worte von ons’rm Lehrer.

„So wird der Aufsatz f’r ons no viel schwerer“,

häbe mir Schualkend’r schnell registriert

ond des Aufsatzschreiba mitnand’r probiert.

​

Jed’r hot irgend a G’schichtle g’schrieba –

wahrheitsgetreu ond ed üb’rtrieba.

Mai Schualkam’rad hot über’s Bada v’rzählt;

dui Zeremonie hot samschdigs nia g’fehlt!

Er hot miaßa s’ Fuier em Wäschkessel hiada

ond ischt d’rvorg’hockt wia d’ Henn beim Brüada.

​

A Holzscheit ischt als „Spech’l“ bekannt ond Fuiermacha ischt mit „schiera“ benannt.

Folgendes stand en saim Aufsatz no dren:

„Das Feuer ist langsam verloschen, ich renn

in den Holzschuppen, um zwei Spechl zu holen,

zum das Feuer zu schieren mit Spech’l und Kohlen.“